Amper is ek doof!

Elke Woensdag dan raak ek liries oor een of ander Suid-Afrikaanse band en ek dink soos my dogter sal se "hulle is die shit"! Nou vandag is geen uitsondering op die reel nie, wie ookal die klipdrift Battle of the bands wil wen, gaan eers vir Motel Inc moet klop, maak 'n aantekening van daai naam, as 'n musiek "kenner" wil ek my verstoud om te se, "move on over Watershed". WOW!

Ek is sooo trots daarop om deel te wees van hierdie ongelooflike projek. Toe Wimpie, my naamgenoot by Klipdrift, en Riaan my nader met die idee ongeveer so ses maande terug was ek bietjie skepties maar ek is so bly ek het ingestem om tog hierdie projek aan te vat. Die tyd vir regte Suid-Afrikaanse musiek het gekom en daar is net eenvoudig 'n oorvloed van talent in hierdie land, hoekom dit is dat bands nie deur die publiek ondersteun word nie, is eerstens 'n tendens wat ek nie kan verstaan nie, en tweedens 'n tendens wat genadiglik aan die verander is...

Carnival City was gisteraand weereens stampvol en ons moes WEER tafels en stoele indra, ek wil voorspel dat die dae van klankmanne wat verveeld rondstaan agter CD spelers is vinnig besig om sy gat te sien. Niks klop die klank van 'n lekker lewendige orkes nie en ek is besig om die winde van verandering in die musiekbedryf te voel waai en dit gaan awesome wees.... Welkom in die musiekbedryf aan die WARE musikante, ek is amper uit my vel van opgewondenheid!

Ek gaan niks se vanoggend oor Mbeki wat sy mense se vertroue verloor het nie, dis die hartseer verhaal van wat met jou gebeur as jy nie meer op grondvlak na mense luister nie. Dis jammer want Mbeki het die geleentheid gehad om sy plekkie in die geskiedenis vas te sement, hoe laat val jy die goue eier van demokrasie wat aan jou gegee is knus toegedraai in watte deur niemand anders as Nelson Mandela nie...

My steke is toe Sondag uitgehaal en ek moet se my been voel stukke beter hoewel nog baie ver van reg af.... danksy 'n haarlyn fraktuur... wat hulle niks aan kan doen nie... vir ses weke... eish!

Net toe ek dink dis min of meer gesondheidsgewys die ergste jaar van my lewe die, raak ek gisteraand doof! Ek maak reg vir Klipdrift en Carnival City gisteraand net klaar gebad, hare gewas en my ore skoongemaak met daai stokkies met die watte aan toe ek skielik en sonder waarskuwing doof word in my regteroor.

Gelukkig ken ek heelwat mense insluitend dr. Ricky wat altyd 'n ereplekkie op my selfoon het presies vir noodgevalle soos die een! Om 'n lang storie kort te maak na die noodoproep en 'n vinnige es by sy spreekkamer spuit hy allerhande snaakse goed met 'n spuit uit my oor uit.... nee ek weet ook nie, ek was elke dag my ore!

Lekker om weer te kan hoor , thanks dok!

Later

Wimpie