Girls (eina) sewe wonders en Zim!

Begin van die week is altyd so ses van die een en 'n halfdosyn van die ander....
Jy weet nie wat die week gaan oplewer nie en gevolglik is jy so tussen twee vure wat die Maandag aanbetref, so teen die middel van die dag het jy sommer klaar besluit watse tipe week dit gaan wees en gevolglik of dit 'n blou Maandag is of nie....
Ek wil nie persoonlike dinge openbaar hier op my blog nie maar ek het 'n rowwe naweek agter die rug en dit alles omdat mense blykbaar nie Afrikaans verstaan nie en omdat jaloesie 'n lelike ding is, ek het nog nooit die nodigheid gesien om mense goed oor en oor te verduidelik nie omdat ek aanneem almal het 'n begrip van Afrikaans wat dit maklik maak om te verstaan, maar nou ja blykbaar is ek verkeerd...
Genoeg daarvan kom ek volstaan net deur te se party mense wat ek ken het 'n helse klomp grootword werk om te doen en moet besef mens storm nie net blindelings in 'n ding in nie, en omdat ek nie bereid is om dit te doen nie beteken nie ek is 'n idiot nie, maar genoeg daarvan.....daardie mense lees mos in elkgeval nie strooi soos my blog nie, so hulle sal in alle geval nie hierdie sien nie.....OF HOE!
Toe ek jonger was, is ek altyd gefassineer deur die sewe wonders van die wereld, wat dit was en hoekom dit as 'n wonder beskou is, vir my was dit altyd maar die piramides omdat daar soveel misterie aan betrokke is, niemand kan vandag nog presies se hoe dit bv gebou is nie...
Wel die nuutste sewe wonders van die wereld is aangewys, hier is hulle:
Meer as 100 miljoen mense het aan die aanwysing van die nuwe Sewe Wonders van die Wêreld deelgeneem. Die wenners is Saterdag aangekondig.





Die piramides van Egipte is outomaties as ’n ere-kandidaat aangewys en hoef geen stemme te gekry het om weer as ’n wonder van die wêreld te kwalifiseer nie.

Die ander wenners is:


Die Groot Muur van China

China se Groot Muur is die wêreld se langste mensgemaakte struktuur en is meer as 6 400 km lank, amper vier en ’n halwe keer die afstand van Johannesburg tot in Kaapstad. Dit is ook die grootste mensgemaakte struktuur wat tot nog toe gebou is, in terme van oppervlakte en gewig.

Die muur is tussen 220 v.C. en 5 v.C. gebou. Die bekendste deel is deur keiser Qin Shi Huang, die eerste keiser van China, gebou.


Petra in Jordanië

Petra is 2 000 jaar gelede in die woestyn van Jordanië deur die Nabatese koninkryk gestig. Die stad bestaan uit versierde pilare, boogingange, grafte, teaters en reliëfbeeldhouwerke wat uit die pienkrooi rots gekerf is.

Die stad is ook bekend daarvoor dat die rolprent Indiana Jones and the Last Crusade daar verfilm is.


Die Christus-beeld in Rio de Janeiro, Brasilië

Dié Christus-beeld, die baken en ikoon van Rio de Janeiro en Brasilië, is 38 m lank en weeg meer as 700 ton. Die standbeeld staan op die piek van die Corcovado-berg in die Tijucawoud-nasionale park en het ’n asemrowende uitsig oor die stad. Die standbeeld is in 1931 opgerig en deur die Frans-Poolse beeldhouer Paul Landowski geskep.


Machu Picchu in Peru

Dié pre-Columbiaanse stad is deur die Inka-beskawing 2 430 m bo seespieël in die Urubamba-vallei opgerig. Dit is in die middel van die 15de eeu gebou tydens die toppunt van die Inkas se beskawing en toe minder as 100 jaar later verlaat toe die Spanjaarde Peru binnegeval het. Volgens argeoloë was die stad in drie dele verdeel: die heilige distrik, die gewilde distrik en die distrik van die priesters en die koninklikes.


Chichen Itza in Mexiko

Chichen Itza is deur die Maja-beskawing gebou en is in die noordelike deel van die Yucatán-skiereiland in Mexiko. Die hoofaantrekking by dié ruïnes is die Tempel van Kukulcan. Dié tempel is in piramide-vorm gebou en tydens die lente- en herfs-nagewening werp die struktuur ’n skaduwee van ’n geveerde slang, die Maja-god Kukulcan, oor die noordelike stel trappe van die piramide.


Die Colosseum, Rome, Italië

Die amfiteater is in die middel van Rome en kon tydens die hoogtepunt van die Romeinse beskawing meer as 50 000 toeskouers huisves. Dit is gebruik vir swaardveg-kompetisies en openbare skouspelle wat gewoonlik wreed en bloeddorstig was.

Die Colosseum bestaan uit vier vlakke waarvan elkeen se pilare in ’n ander styl geskep is.




Die Taj Mahal, Agra, Indië

As daar ooit ’n monument vir liefde was, is dit die Taj Mahal. Die Moegalse keiser Shah Jahan het dit laat bou as ’n praalgraf vir sy gunsteling-vrou, Mumtaz Mahal.

Jahan was volgens oorlewering só bewoë toe hy die eindresultaat sien, dat hy beveel het dat die argitek se regterduim afgekap word sodat hy nooit weer iets so mooi kon ontwerp nie. Die Taj Mahal is uit wit marmer gebou, wat effens deurskynend is en deur die loop van die dag van kleur verander

Wel daar is dit die amptelike lys van die sewe wonders van die wereld...
Ek het toe nie genoeg geld op die July gewen om te kan aftree nie, inteendeel nie eers genoeg gewen vir 'n hotdog nie, sorry!
Ek sluit af vanoggend met die belaglike stand van sake in Mugabewe, oftewel die eens pragtige Zimbabwe en wat ek terdee hoop nie een van die dae Suid-Afrika gaan wees nie...
Kwotasies in Zimbabwe wat deesdae gegee word is net 'n paar uur geldig en nie meer sewe dae soos in die verlede nie....dis 'n ware verhaal en nie 'n joke nie, die rede inflasie staan op 4000%! Werkers vra om eerder met kos vergoed te word as met geld!
En steeds staan ons regering met handjies gevou en wil niks doen aan hulle voormalige kameraad en vryheidsvegter Robert Mugabe nie, dit tervyl 50 000 onwettige immigrante daagliks van die noorde hier instroom!
33 Top sakelui is in Zim gearresteer, weet jy hoekom hulle wil nie hulle pryse met 50% verlaag nie, ongeag wat hulle kosprys was nie....
Dis 'n joke en dit maak my die wetter in en nog steeds val die stilswye van mnre Mbeki en kie saggies op die ore van die res van die wereld wat met groot oe staan en kyk na dit wat hier in die Suidste punt van Afrika gebeur en ons gewone Suid-Afrikaners skud ons koppe in verslaentheid en ongeloof!
Dis al vir vandag, o ja ek is op soek na 'n date vir Oos Rand Stereo se Fanus huldigingsaand aangesien my dogter tans die enigste vrou in my lewe is en sy klaar iets aan het daai aand..... so laat weet maar as iemand dalk iets vir my kan reel, ek belowe 'n lekker fun aand met 'n vyf gang ete, en ja natuurlik GREAT geselsskap, ek wag in spanning.
Later!
Wimpels.