My beurt!

Ek gaan nie more blog nie aangesien ek 'n bietjie 'n langnaweek het! Jy sien ek het mos Maandag gewerk juis sodat ek bietjie more kan af he.

Nou ja ek gaan bietjie 'n jol he die naweek, Aardklop toe later vandag, more terug dan Graceland toe vir golf en dan terug Saterdag en Sondag trek!

Nou ja dit gaan awesome wees en 'n great naweek ek kan nie wag nie, tussendeur speel die bokke natuurlik nog Sondag teen die Yanks, gelukkig is Frans Steyn darem in die span....!

Nog steeds besig met The Secret en die geheime van die Laws of Attraction en die krag van positiewe denke, ek het besluit die enigste manier om alles wat die laaste paar dae met my gebeur het getrou weer te gee is om dit in 'n dagboekformaat aan te teken want dis bykans onmoontlik om te glo en nog meer onmoontlik om al die klein goedjies te onthou!
Werk dit, so seker as wat parra manel dra! Het dit my lewe verander? Verseker in so 'n mate dat niks ooit weer vir my dieselfde sal wees nie, loop ek met 'n klippie in my sak rond? Beslis ja, is jy nou nuuskierig, as jy is, lees Maandag my blog ek gaan probeer om jou te vertel wat het alles in een week met my gebeur en dan besluit jy vir jouself!
Glo ek, ek gaan vervulling in elke afdeling van my lewe kry, jy beter dit glo ja, want dit gaan gebeur, selfs in my liefdeslewe, hoe weet ek nie, maar glo, glo ek dit!

’n Getuie in die dronkbestuursaak van regter Nkola Motata van die Pretoriase Hooggeregshof het gevra om nie identifiseer of afgeneem te word voor hy vandag getuig het in die Johannesburgse landdroshof nie. Hy sê sy sakebelange kan in gedrang kom as sy naam bekend gemaak word. Mail & Guardian berig dat Motata vroeër skuld ontken het op al die aanklagte. Hy is in Januarie in hegtenis geneem nadat hy met sy motor teen ‘n muur vasgery het in Hurlingham, Johannesburg. Die staat beweer sy bloedalkoholvlak was minstens vier keer hoër as die wettige perk.
Volgens 'n pel van my wat die hofsaak namens 'n ander radiostasie dophou, grens hierdie hofsaak aan die absurde, ek hoop om teen Maandag bietjie meer agtergrondinligting te he van die seksisties en rassistiese uitsprake wat die regter na bewering gemaak het!

Dit lyk of werk aan Kaapstad se sokkerstadion vir 2010 vandag hervat gaan word. Die projekdirekteur van die Groenpuntstadion, Andrew Fanton, glo ‘n ooreenkoms is met die betrokke vakbond bereik oor ‘n reisgeskil. Alle werk by die terrein het verlede Woensdag tot stilstand gekom toe sowat een duisend-200 werkers van Murray & Roberts en WBHO begin staak het. Die kontrakteurs en die Boukonstruksie- en Verwante Werkersvakbond het blykbaar nou ooreen gekom oor ‘n nuwe punt waar werkers op- en afgelaai sal word.
Hoe gaan ons ooit betyds klaar wees vir 2010?! Mense dis oor omtrent 2 jaar!

Die Zimbabwiese parlement het ‘n nuwe wetsontwerp deurgevoer om meerderheidsbeheer oor maatskappye wat aan buitelanders behoort, aan swart Zimbabwiërs oor te gee. Die doel is om ‘n aandeelhouding van minstens 51 persent te verseker vir inheemse swartmense in die meerderheid sakeondernemings. Die BBC berig dat die wetsontwerp ‘n proses voltooi wat begin het met die omstrede beslaglegging op blanke plase in 1999. Zimbabwe ondervind tans die hoogste inflasiekoers ter wêreld en tekorte aan kos, brandstof en buitelandse valuta. Die wetsontwerp moet aan die Senaat voorgelê word vir finale goedkeuring. Dit het reeds die ondersteuning van president Robert Mugabe se regering. Kritici sê die wetgewing kan enige beleggersvertroue skaad wat nog in die land mag wees.
Watse beleggersvertroue in die land? Huh?

Lekker naweek, ek blog weer Maandag, wat jy ookal doen, Gaan voluit, moet niks terughou nie!

Later
Wimpie